ზაალ აბაშიძე

ზაალ (ზაზა) დავითის ძე აბაშიძე, დაიბადა ქ. თბილისში, 1957 წლის 28 ნოემბერს. სწავლობდა ქ. თბილისის 23-ე საშუალო სკოლაში, რომელიც 1974 წელს დაამთავრა. 1974 წელს ჩაირიცხა მოსკოვის ისტორია-არქივმცოდნეობის სახელმწიფო ინსტიტუტის არქივმცოდნეობის ფაკულტეტზე. 1976-1979 წ.წ. სწავლობდა თსუ ისტორიის ფაკულტეტზე. 1997 წელს დაიცვა დისერტაცია და მიენიჭა მეცნიერებათა კანდიდატის ხარისხი.

1980-2005 წ.წ. მუშაობდა თსუ საქართველოს ისტორიის კათედრაზე ლაბორანტად, უმცროს მეცნიერ-მუშაკად, მასწავლებლად, დოცენტად. 1980-1985 წ.წ. პარალელურად ასწავლიდა ისტორიას თბილისის 53-ე საშუალო სკოლაში.

1993-1996 წ.წ. მუშაობდა საქართველოს საგარეო საქმეთა სამინისტროში სამმართველოს უფროსის მოადგილედ, სამმართველოს უფროსად. 2005-2006 წ.წ. იყო საქართველოს ეროვნული ბიბლიოთეკის გენერალური დირექტორი.

2006 წ. საქართველოს ეროვნული არქივის დირექციის მრჩეველი. 2006 წლიდან დღემდე საქართველოს საპატრიარქოს საეკლესიო-საენციკლოპედიო ცენტრის ხელმძღვანელი და ქართული მართლმადიდებლური ენციკლოპედიის მთავარი რედაქტორი.

2015 წლის მაისიდან დღემდე არის სსიპ კორნელი კეკელიძის სახელობის საქართველოს ხელნაწერთა ეროვნული ცენტრის დირექტორი.

არის ორმოცდაათამდე სამეცნიერო ნაშრომის ავტორი (სამეცნიერო მუშაობის სფერო - საეკლესიო ისტორია და ისტორიოგრაფია).

ელდარ ბუბულაშვილი

პროფესორი ელდარ ბუბულაშვილი დაიბადა 1958 წლის 3 ოქტომბერს. 1985–1988 წლებში სწავლობდა ასპირანტურაში ივანე ჯავახიშვილის სახელობის ისტორიისა და ეთნოლოგიის ინსტიტუტში, ახალი ისტორიის განყოფილებაში. არის ისტორიის მეცნიერებათა დოქტორი, გელათის მეცნიერებათა აკადემიის აკადემიკოსი და პროფესორი.

1988 წლის 26 ოქტომბერს დაიცვა ისტორიის მეცნიერებათა კანდიდატის დისერტაცია თემაზე „ზაქარია ჭიჭინაძე და საქართველოს ახალი ისტორიის საკითხები“ (დიპლომი ИТ №13123), ხოლო 2006 წლის 9 ივნისს მიენიჭა ისტორიის მეცნიერებათა დოქტორის ხარისხი დისერტაციისათვის „საქართველოს ეკლესია ეგზარქოსობის დროს“ (დიპლომი №001693).

1990 წლიდან დღემდე არის თბილისის სასულიერო აკადემიის პროფესორი. 2001 წლიდან დღემდე არის საქართველოს საპატრიარქოსთან არსებული ქრისტიანული კვლევის საერთაშორისო ცენტრის ერთ-ერთი დამფუძნებელი და გამგეობის წევრი, ამავე ცენტრთან არსებული ჟურნალ „ლოგოსის“ დამფუძნებელი და სარედაქციო კოლეგიის წევრი; 1999 წლიდან დღემდე — ჟურნალ „ჯვარი ვაზისას“ სარედაქციო კოლეგიის წევრი.

2006 წლიდან დღემდე მუშაობს ივ. ჯავახიშვილის სახელობის ისტორიისა და ეთნოლოგიის ინსტიტუტში მთავარ მეცნიერ-თანამშრომლად. 2001 წლიდან დღემდე არის საქართველოს საპატრიარქოს გამომცემლობისა და რეცენზირების დეპარტამენტის კომისიის წევრი; 2003 წლიდან დღემდე — საქართველოში ანდრია მოციქულის მიმოსვლის გზის დამდგენი მუდმივმოქმედი ექსპედიციის წევრი; 2009 წლიდან დღემდე — ენციკლოპედია „საქართველოს“ სარედაქციო კოლეგიის წევრი და კონსულტანტი.

2012 წლიდან არის საქართველოს მეცნიერებათა ეროვნულ აკადემიასთან არსებული საქართველოს წყაროების დამდგენი კომისიისა და საქართველოს მართლმადიდებელი ენციკლოპედიის რედაქციის წევრი. 2013 წლიდან დღემდე არის საქართველოს სახელმწიფოსა და საქართველოს ავტოკეფალურ ეკლესიას შორის კონსტიტუციური შეთანხმებით შექმნილი სამთავრობო კომისიის წევრი.

1987 წლიდან დღემდე ქართულ, რუსულ, ინგლისურ და ბერძნულ ენებზე გამოქვეყნებული აქვს 248 სამეცნიერო ნაშრომი, მათ შორის 16 წიგნი და მონოგრაფია.

ლევან გორდეზიანი

გორდეზიანი ლევან რისმაგის ძე დაიბადა 1962 წლის 1 ნოემბერს ქ. თბილისში. არის ისტორიკოსი და პროფესორი. დაამთავრა თბილისის სახელმწიფო უნივერსიტეტის ისტორიის ფაკულტეტი (1984).

მიენიჭა ისტორიის მეცნიერებათა კანდიდატის ხარისხი (1990) და ისტორიის მეცნიერებათა დოქტორის ხარისხი (1999). არის თსუ დოცენტი (1995) და პროფესორი (2001).

2005–2006 წლებში იყო თბილისის სახელმწიფო უნივერსიტეტის რექტორის მოადგილე. 2006–2025 წლებში ხელმძღვანელობდა თსუ ძველი მსოფლიოს ისტორიის კათედრას და ამავე პერიოდში იყო პროფესორი.

2011–2014 წლებში ხელმძღვანელობდა თსუ მსოფლიო ისტორიის ინსტიტუტს. 2014–2018 წლებში იყო თსუ წარმომადგენლობითი საბჭოს წევრი. 2016–2019 წლებში იყო საგანმანათლებლო პროგრამების აკრედიტაციის საბჭოს წევრი.

2018–2025 წლებში იყო ივანე ჯავახიშვილის სახელობის ისტორიისა და ეთნოლოგიის ინსტიტუტის მთავარი მეცნიერ-თანამშრომელი და ძველი ისტორიის განყოფილების გამგე.

2021 წელს იყო ისტორიის უმაღლესი განათლების დარგობრივი საბჭოს თავმჯდომარე. 2023–2024 წლებში იყო საქართველოს ეროვნული პრემიის კომისიის წევრი. 2023 წელს დაჯილდოვდა ღირსების მედლით.

არის მრავალი სამეცნიერო პუბლიკაციის ავტორი.

ლონგინოზ სუარიშვილი

მღვდელი ლონგინოზ სუარიშვილი (იოსების ძე) დაიბადა თბილისში 1982 წლის 29 ოქტომბერს.

2004 წელს დაამთავრა თბილისის სასულიერო სემინარია და დაიცვა საბაკალავრო ნაშრომი თემაზე „სამართლებრივი სწავლება სამღვდელო ხარისხის შესახებ“ (თეოლოგიის ბაკალავრი).

2011 წელს დაასრულა თბილისის სასულიერო აკადემიის მაგისტრატურა და დაიცვა სამაგისტრო ნაშრომი თემაზე „სხვადასხვა სარწმუნოებიდან და აღმსარებლობიდან მართლმადიდებლობაზე მოქცეულთა მიღების წესგანგებანი“ (თეოლოგიის მაგისტრი).

2007 წლის 18 ნოემბერს დიაკვნად, ხოლო 2011 წლის 12 სექტემბერს მღვდლად ხელდასხმულია.

2011 წლიდან ასწავლის კანონიკურ სამართალს თბილისის სასულიერო აკადემიასა და სემინარიაში; 2013 წლიდან არის თბილისის სასულიერო აკადემიისა და სემინარიის დოქტორანტი.

2016 წლის 22 მაისს დაინიშნა აკადემიის დეკანად, 2019 წლის 12 სექტემბერს — კანონიკური სამართლის კათედრის გამგედ.

2020 წლიდან მიწვეული პედაგოგია თსუ-ის იურიდიულ ფაკულტეტზე. არის საერთაშორისო და ადგილობრივი კონფერენციების მონაწილე; გამოქვეყნებული აქვს სამეცნიერო სტატიები და პუბლიკაციები.